Af Elínu er það að segja...

Ein ég sit og sauma...

2008-03-16T16:37:00.003+03:00

inni í litlu húsi, enginn kemur að sjá mig, nema litli fuglinn. Það er semsagt dugnaðurinn, ég er búin að sitja heima hjá mér í rúma tvo mánuði. Hef enga orku í að vinna þar sem öll orkan mín virðist fara í að búa til barn. Annars af öðrum barnamálum er það að frétta að Heba eignaðist son 8 mars eða á alþjóðlega kvennadaginn.

Eins og ég sagði þá sit ég heima hjá mér þessa dagana og geri mest lítið. Litli haninn minn er voða ánægður þar sem oftast fær hann að sitja hjá mér.

Það er búið að vera mikill snjór hérna í feb og mars. Það leit út fyrir það um daginn að hann væri að fara en svo kom bara enn meira. Finnar eru voða duglegir að moka snjó af gangstéttum, of duglegir að mínu mati. Ég sakna stundum illa sköfuðu gangstéttana úr Reykjavík. Málið er að þeir eiga til að skafa alla gangstéttina og svo slétt og fínt að þetta verður sleypt eftirá. Það er svosem í lagi þegar þeir setja sand á sem þeir eru oftast duglegir með. Það fer aftur á móti í verra þegar snjórinn er allur farinn og það er svo þykkt lag af möl á gangstéttinni að maður rennur í því. Ég bý á hæð og þarf alltaf að labba niður til að komast út úr húsi. Það getur verið svolítið erfitt stundum.

Það verður gert við húsið okkar í sumar og haust. Ætti að vera áhugavert. Lítur út fyrir að við verðum fyrir þónokkrum truflunum. Skv því sem mér skilst á að grafa niður að einum vegg, rífa mest af veggjunum utanfrá og laga þá og svo þurka þá innan frá. Þar sem þurkararnir þurfa 2 metra þá verður voða lítið eftir af íbúðinni til að búa í á meðan. Við þurfum líklegast að flýja eitthvert á meðan það stig gengur yfir. Svo rússínan í pylsuendanum eða þannig, litla krílið á að koma í maí þannig að það verður hérna á meðan ósköpin ganga yfir. Þetta er ekki alveg rólega sumarið sem ég hafði hugsað mér að hafa en það er víst lítið við því að gera.

2008-02-17T11:09:00.002+03:00

Ég er alltaf svo mikið á leiðinni að skrifa eitthvað hérna að ég bara næ því aldrei að koma þessu öllu niður. Ég ætlaði að segja frá hjúkkuhópuppsögnunum sem aldrei urðu, þeir sömdu við þær rétt í tæka tíð. Það á víst að verða einhver veruleg launahækkun. Þeir dreyfðu þessu á tvö ár ef ég man rétt. Sumir segja að þetta sé fín launahækkun, aðrir að þetta sé ekki svo gott.

Svo ætlaði ég líka að segja frá aumingja Nokiabúum sem lentu í því að fá skolpvatn í bland við drykkjarvatnið sitt svona rétt fyrir jól. Það tók víst voða langan tíma að hreinsa aftur vatnsleiðslurnar. Ég hef reyndar voða lítið heyrt af þessu þannig að ég veit ekki hvort þetta sé í lagi núna. Ég er voða ódugleg við að fylgjast með fréttum.

Ég fór til læknis um daginn til að láta taka af nokkra ljóta fæðingabletti, þetta eru reyndar engir FÆÐINGAblettir heldur klessur sem komu fyrir ca 3 árum. Ég bað lækninn um að taka 4 og hann tók 9. Ég er reyndar voða ánægð með það. Ég bað bara um þessa 4 af því mér var sagt að oftast tækju þeir 1-3. Þessir 4 voru á tveim stöðum þannig ég hélt það myndi reddast. Þessir blettir eru víst sauðmeinlausir en ákaflega ljótir. Ég fékk mikið af þeim á bakið eftir að ég ákvað eitt sumarið að sjá hvort ég gæti ekki orðið brún eins og allir hinir (tókst ekki).

Eitt enn sem ég er alltaf á leiðinni með er að setja upp smá síðu. Ég byrjaði á þessu fyrir nokkrum mánuðum og svo stoppaði það. Annars stendur það núna á því að maður þarf að borga smá fyrir síðuna og ég er ekki búin að því. Þarf að redda því áður en ég get haldið áfram. Það var enn eitt sem ég ætlaði að skrifa hérna, um síðuna og hafa linkinn.

Það hefur verið voða lítill vetur hérna núna. Það byrjaði ekki að snjóa fyrr en um miðjan janúar. Oft hefur frost hérna farið niður í -20°c en núna hefur það kaldasta sem ég sá verið -14°c eina nóttina. Oftast er hitinn um frostmark. Ég er reyndar voða fúl yfir þessu þar sem ég ætlaði að nota frostið til að afþýða ísskápinn. Er búin að plana þetta síðan í sumar.

Rétt fyrir jólin kom kona að mæla hjá okkur raka í veggjum. Þetta var sem betur fer innan eðlilegra marka. Það fynda var að ég var búin að vera voðalega dugleg að baka fyrir jólin og hún minntist á að hér væri góð lykt. Ég bauð henni upp á smáköku. Finnar eru ekki gefnir fyrir svona smáskraf við ókunnugt fólk. Eins og finnum ber hafði þessi kona bara einbeint sér að því sem hún var að gera þegar hún var að mæla veggina (það tók uþb klst). Þegar ég gaf henni smákökuna fór hún að tala við mig og sagði mér frá ferðaáætlunum sínum. Maður þarf semsagt að múta finnum með smákökum til að fá þá til að skrafa.

2007-10-25T17:15:00.000+03:00

Hjúkkur í Finnlandi eru að segja upp störfum sínum. Þessar hópuppsagnir eru til að krefjast betri launa. Samkvæmt stéttarfélaginu sem stendur á bakvið þetta eiga allir að fá störf sín aftur eftir samninga.

Ég sagði ekki upp. Ég var að hugsa um það en ákvað svo að aðstæður mínar eru ekki nógu hagstæðar til geta orðið atvinnulaus í einhvern tíma ef að í hið versta fer. Annars er ég með voða stuttan uppsagnafrest, bara 2 vikur. Þeir sem hafa unnið í 5 ár og lengur eru með mánaðar uppsagnafrest. Ef að þetta hefði verið amk mánuður hefði ég kannski sagt upp, hefði þá haft smá tíma til að líta í kring um mig á önnur störf.

Annars verður áhugavert að sjá hvað kemur út úr þessu. Mikið af hjúkkum af háskólasjúkrahúsinu hérna hefur sagt upp störfum sínum. Allar af hjartadeild, nærri allar af bráðavaktinni.

Það var íkorni að njósna um mig áðan. Heyrði einhvern voða skruðning og sá brúnleitt skott fyrir utan gluggan. Veit ekki hvort þetta sé sá sami íkorni og hefur áður verið að hoppa á glugganum mínum. Skil ekki hvað hann þykist finna þarna.

Það er voðalega kuldalegt hérna núna. Hitinn hefur verið 5-7 stig en það er samt skítakallt. Laufin eru flest fallin af trjánum. Nóvember heitir á finnsku marraskuu og einhvern tíman var mér sagt að marras er eitthvað kallt dimmt og drungalegt. Væri miklu betra ef snjóaði, en venjulega snjóar ekki fyrr en í desember eða síðar.

Sól sól skýn á mig...

2007-08-16T14:05:00.001+03:00

Átti ekki alveg að líða svona langur tími á milli færsla. Ég hef verið svo voða mikið að hugsa um það sem ég ætla að skrifa hérna og hvernig ég skrifa það að ég bara hef ekki haft tíma til að skrifa það.

Ég er í sumarfríi núna, verð enn í fríi út þessa viku. Ég ætla að skella mér til Austurríkis á morgun til að hitta netvinkonu mína. Þetta verður bara stutt helgarferð.

Það er búið að vera frekar blautt sumar hérna. Hefur verið heitt núna í ágúst en samt ekkert voða. Passar vel fyrir mig því að ég er ekkert hrifin af því að vera úti í 25+ stiga hita (vil ekki brenna, er löt við að bera á mig áburð svo það er léttara að vera bara inni) auk þess sem sólin skýn beint á stofu og eldhúsgluggana hjá mér og það er iðurlega 28-30 stiga hiti inni og frekar erfitt að lofta út.

Ég er enn að dansa á fullu og áhuginn virðist ekkert fara minkandi, þvert á móti. Ég var svo heppin að fríið mitt byrjaði akkúrat þegar flamencovika Tampere var (þeir eru víst búnir að vera með svoleiðis í nærri 20 ár). Ég fór semsagt á tvær sýningar og einn kúrs sem þeir voru með. Var að dansa í 2 klst á dag frá mánudegi til föstudags. Núna er ég svo á einum stuttum kúrs þar sem ég læri að dansa með sjal. Voða gaman að þeyta þessu um.

Hræðilegt að skrifa íslensku núna. Man ekki hvar á að vera einfaldur eða tvöfaldur samhljóði og er svona aðeins að rugla p og b. Finnar nota nefnilega ekki b, þeir nota p og bera það fram nærri því eins og b. Sama saga með t og d og svo k og g, nota þá fyrrnefndu en bera fram eins og þá fyrrnefndu.

Tvær samstarfskonur mínar skruppu til íslands í sumar. Önnur í júní og hin í júlí. Ég er búin að sjá myndirnar frá þeirri sem fór í júní. Hún skrapp í ráðhúsið og heilsaði upp á fyrrum samstarfélaga minn þar. Ég var búin að segja henni að ég hafi verið þar og að ég hafi verið í upplýsingadeildinni, var ekki viss um hvort hún myndi fara þangað eða hvort hún myndi vaða á einhvern og spjalla.

Ég er búin að vera í 2 brúðkaupum í sumar. Heba giftist í júní. Hún er núna frú Heba :-D Svo giftist líka finnsk vinkona mín í enda júlí.

Jæja ég þarf að fara að mauka berin mín. Ég er með berjarunna hérna og berin eru fullþroskuð. Það sem ég hef alldrei verið hrifin af að borða ber brá ég á það ráð í fyrra að mauka þau í matvinnsluvél og sýja safan frá. Kemur alveg ljómandi safi út úr þessu (að mínu mati, þeim sem hafa smakkað finnst hann of súr) sem ég svo frysti og er að lepja svona þegar ég man.

hvaða vika var það vænan?

2007-04-10T23:42:00.000+03:00

Finnar eiga það til að telja í vikum. Ég las um endurbætur á búð og það á allt að vera tilbúið á viku 18. Veit einhver hvenær er vika 18? Ég held að við séum núna á viku 15, hef ekki græna glóru um hvort það sé rétt eða ekki. Man bara að læknirinn á deildinni okkar var í fríi viku 11 og það var fyrir nokkrum vikum.

Þetta er sossum hentugt kerfi nema það er bara smá galli, það veit enginn hvað um er að ræða. Maður þarf að fletta því upp.

Vinnan og vinnan, vinnan er ástæðan fyrir því að ég hef ekkert skrifað hérna. Það var smá vandi í vinnunni hjá mér, eiginlega ekki smá, svolítið stærri en smá. Ég var alvarlega að hugsa um að ganga út fyrir ca 2 vikum. Gerði það ekki en veit ekki alveg hvort að ég eigi að taka hlutina í sátt eður ei. Málin eru svolítið mikið í ólagi þar. Sjáum til.

Annars átti ég ágæta og afslappaða páska. Var í 5 daga fríi sem er sjaldgæfur lúxus. Ég gerði nákvæmlega ekki neitt. Við tókum aðeins til, íbúðin var í rúst, þvoði slatta af þvotti en fyrir utan það ekki neitt.

Fór á Edith Piaf myndina í dag. Var bara nokkuð góð. Alltaf gaman að horfa á franska mynd með finskum og sænskum texta. Mér tókst svona af og til að rugla sjála mig rækilega í ríminu með að gera það sem maður er vanur, lesa bara nokkur orð úr textanum hér og þar. Sama sagan tvisvar á tveim tungum. Held reyndar að ég hafi náð meiru úr finnska textanum en þeim sænska. Ég nota finnsku meira en sænsku heh.

Eitt fyndið með vinnuna, það er hún Irina. Irina er rússnesk kona. Ég hitti hana fyrst í feb 2004. Við vorum saman á finnskunámskeiði. Við byrjuðum á sama tíma og vorum báðar í 10 mánuði. Svo skildust leiðir. Ég hafði ekkert samband við hana. Svo í des 2005 byrja ég á deild 11 á Koukkuniemi, viku síðar labbar Irina inn, hún var þarna til að fá vinnureynslu (tíðkast svoleiðis á íslandi?). Irina var þarna í amk hálft ár áður en hún fór í skóla að læra til sjúkraliða. Ég hélt engu sambandi við hana frekar en fyrri daginn. Jæja svo byrja ég á deild 26 aka rugluðu deildinni. Viku síðar labbar Irina inn. Hún á víst að vera þarna í 3 mánuði sem verklegan hlut af náminu. Ég spurði hana hvert við förum næst, hún var ekki viss.

Þetta fer reyndar bráðum að verða eins og á íslandi hérna. Um daginn hitti ég eina konu úr flamenco hópnum mínum í búð. Daginn eftir hitti ég aðra stúlku úr flamenco hópnum á vinnustaðnum mínum. Ég hafði fengið þá flugu í hausinn að labba niður stigann í stað þess að taka lyftuna. Ég hitti hana í stiganum. Ég vissi ekki einu sinn að hún væri að vinna í heilbrigðisgeiranum. Hún var bara þarna í afleysingum svo ég efast um að ég hitti hana aftur.

Jæja, háttatími :-)

Lobba í sjónvarpinu

2007-03-13T23:25:00.000+03:00

Af því að deildinni minni hefur verið lokað var hún notuð til að taka nokkrar senur fyrir einhvern sjónvarpsþátt. Ég og önnur stelpa sem vinnur með mér buðumst til að taka þátt, að leika hjúkkur. Þar sem deildin er frekar köld þá fór ég í lobbuna góðu sem Magga prjónaði yfir hjúkkufötin (ég tek hana ekki venjulega með í vinnuna, er allt of fín en ég var ekki að fara að gera neitt sem gæti skaðað hana). Þeim leist alveg ljómvel á lobbuna og þar sem ég átti að vera næturhjúkkan sögðu þeir mér að fara endilega í lobbuna.

Þetta tók tæpa tvo tíma, ég var að labba fram og aftur fyrir framan myndavélina og kíkja í herbergi (sjúklingurinn tínist víst) og hringja svo í lögguna til að tilkynna hvarfið.

Ég var aðeins að spjalla svona við sjónvarpsfólkið og það kom upp að ég flutti hingað eftir að hafa fundið Riku í gegn um netið. Þeim fannst það voða sniðugt og fengu nafn og síma ef ske kynni að þeir gerðu einhvern þátt um svoleiðis.

Alltaf gaman að vera íslenska selebið. Fólk verður mjög forvitið þegar það fréttir að ég er íslensk. Spyrja ávalt hversvegna ég kom hingað. Það er svolítið þreytandi að svara þessu aftur og aftur og aftur en ég skil alveg forvitnina. Ég myndi áraðinlega líka spyrja einhvern útlending.
Sagan er dálítið búin að styttast núna, oftast nægir bara að ég segi að hitti mann.

Það er kona sem er í flamencotíma (þurfti að koma smá flamenco líka haha ) á eftir okkur Hebu. Hún heyrði að við vorum að tala íslensku og spurði okkur hvort við værum íslenskar. Hún hefur víst einhverntíman fyrir tuttugu árum farið til íslands á íslenskunámskeið. Var einhver stuttur kúrs til að kynnast landi og menningu. Það er voða gaman alltaf þegar við hittum hana að spyrja á íslensku "hvað segiru gott" og segja "góðan daginn".

Ég tók tvær myndir á labbi í dag. Ein er af bílskúrum (áhersla á skúra) og hin er af bíl sem var stungið í samband. Ég þarf að fá Söndru til að segja mér hvernig sé best að byrta myndir á blogginu. Ég er með myndasíðu annars staðar en ég er ekki alveg viss hvort að það sé betra að nota hana eða hvort að það sé annar möguleiki.

Ekki einfaldast hlutirnir

2007-03-08T17:24:00.000+03:00

Þurfti að fara í gegn um þvílíka króka til að komast inn á bloggið. En komst samt :-)

Í dag var síðasti dagurinn á gömlu deildinni minni. Ég var í fríi en kíkti samt í kaffi. Það voru kökur þarna á boðstólunum. Ég ákvað að koma með eitthvað íslenskt. Ég bakaði (lesist horfði á Hebu baka fyrir mig) vatnsdeigsbollur. Þær féllu vel en voru ekki eins sérstakar og ég hafði vonast til. Þeim fannst þetta eitthvað kunnuglegt á bragðið.

Annars gerðust undur og stórmerki í vinnunni hjá mér, mér var boðinn fastur samningur. Ég þáði hann. Hugsaði málið í nokkra daga en ákvað svo að væri betra að hafa fastan samning heldur en svona smá samninga hér og þar. Þessu fylgja þau hlunnindi að ég verð ekki lengur í hvítum vinnufötum með ruslasmellum sem opnast allt og auðveldlega :-D

Hvítu fötin fara í pirrurnar á mér af því að það sést allt of vel í gegn um þetta ef maður er tildæmis í skræpóttum naríum. Jakkinn er það síður að ég er alltaf að festa faldinn í rúmunum og svo þegar ég hreyfi mig opnast allt. Ég er reyndar alltaf í bol undir en þykir samt ekkert gaman að vinnugallinn opnist án leyfis.

Ég ætlaði að bölva aðeins bílskúrnum mínum hérna. Maður er vanur svo fínum bílskúrum frá íslandi, fólk hefur jafnvel búið í þessu. Hérna aftur á móti er þetta bara skúr. Þetta er svona járnskúr, einn langur fyrir alla og það eina sem skilur á milli eru einhverjar járnsúlur (þeas er hægt að labba yfir í skúr nágrannans). Svo er þetta svo þröngt að maður verður helst að tæma bílinn af fólki og hlutum áður en maður smeygir bílnum inn. Til að komast sjálfur úr bílnum verður svo að skáskjóta sér. Ég skil ekki hvernig þybbið fólk getur notað þetta, ég er svona í minna laginu og á erfitt með að komast í og úr bíl.

Lítur aðeins út fyrir að veturinn sé að fara. Það er tveggja stiga hiti núna. Þetta var ákaflega stuttur vetur. Annars þá þýðist nafn mars, "maaliskuu" sem "jarðar"mánuður. Þá sér maður sko í jörð. Febrúar er helmikuu eða perlumánuður og janúar er tammikuu eða eikarmánuðurinn (frost eins hörð og eik er mér sagt). Finnsku mánaðarheitin eru mun skemmtilegri en þessi íslensku/indoevrósku.

Pilsasmíðarnar mínar gengu ekkert allt of vel. Faldurinn á pilsinu er 4m og þar sem ég ætlaði að hafa 1.5sinnum þá lengd rykkta neðan á faldinn (úff hvað heitir svona á íslensku) var ég búin að reikna að ég þyrfti 6 metra til að bæta við. Ég mældi hvað efnið var langt, og klippti niður 8 búta. Faldaði þetta allt og festi saman. Svo kom af því að festa síðustu endana saman. Ég fékk Riku til að hjálpa mér, rétti honum annan endan og labbaði af stað með hinn. Þetta var eitthvað ógurlega langt. Ég var víst með 12 metra. Efnið hafði legið tvöfalt þegar ég mældi það. Núna er ég að velta fyrir mér hversu mikið efni ég ætti að nota í rykkinguna þarna að neðan, hvort ég komist upp með að nota 2x eða 8 metra. Frekar leiðinlegt að henda efninu þegar ég er búin að hafa svona mikið fyrir að falda þetta allt. Ég á eftir að gera hina rykkinguna, fékk eiginlega alveg nóg eftir 12 metrana.

Við Riku erum að fara að skreppa á eftir í gigantti, sem lítur alveg ótrúlega mikið út eins og elko heh. Þetta er sama búðin. Gamla steríóið mitt er alveg að fríka og ég ætlaði að kaupa nýtt. Ég keypti hitt fyrir 6 árum, held að einu kröfurnar hafi verið að það væri sem ódýrast. 6 ár er víst nokk gott þessa dagana. Hef ekki mikið notað það, svona af og til hennt einhverjum disk í það.

Ég er annars farið að hlusta svolítið mikið á spænska tónlist. Þið getið séð myndband við nýjasta uppáhaldslagið mitt hérna: http://www.youtube.com/watch?v=shwZTBkTPuo

2007-02-21T15:55:00.000+03:00

Ég er alltaf á leiðinni að uppfæra þetta, alltaf að hugsa um allt sem ég ætla að skrifa, en svo gleymist bara að setjast niður og skrifa.

Það er búið að vera kallt hérna síðustu vikur, frostið hefur farið niður í -32 þegar var kaldast. Í morgun var það -24. Það er samt ekkert svo kalt, alveg satt :-)
Sko maður fer í 4 peysur (flíspeysuna frá mömmu og lobbuna sem Magga prjónaði)
tvennar buxur og sokkabuxur
tvenna til þrenna sokka
þrenna vettlinga
lætur á sig tvo trefla (eða hálsklút plús trefil)
og húfu
Og þá er allt í fína.

Það er frídagur hjá mér í dag, ég er bara að dúlla mér. Fer aftur í vinnuna á morgun og vinn 1 kvöldvakt, 2 morgunvaktir og 3 næturvaktir.

Ef einhverjum langar til að sjá mig þá set ég stundum upp video á youtube. Þeas http://www.youtube.com notendanafnið mitt er LittleToe. Leitið bara. Núna er ég ma með flamenco video uppi. Ég ætla ekki að hafa það lengi (ég dansa betur núna, vil ekki hafa lélegt dansvideo hangandi þarna inni lengi) þannig að forvitnir drífið ykkur í að kíkja.

Það er alltaf jafn gaman í dansinum. Við erum að læra meira sevillanes (eru 4 stuttir dansar, erum nýbúin að læra nr 3) og svo erum við byrjuð á rúmbu.

Ég keypti efni í flamenco pils í dag. Veit ekki hvort ég reyni að sauma það á eftir. Ég er með hugmynd í kollinum hvernig ég vil gera það en ekkert snið. Þetta er sem betur fer ódýrt efni (3.90€ metrinn, hélt maður fengi bara óbleykt léreft fyrir svona prís) þannig að ég þarf ekkert voðalega að stressa mig yfir mistökum.

Mér tókst víst ekki að fá neinn Þorramat. Ég var búin að vera að hrella vinnufélagana mína á því að ég kæmi með súrsaða hrútspunga að gefa þeim. Ég var með svið í haust. Það voru bara nokkrir sem þorðu að smakka. Ég var meira að segja búin að skera þetta af beinin af svo að þau þyrftu ekki að horfast í augu við rolluna. Voðalegir gikkir þessir finnar. Annars fannst mér það ekki svo slæmt, var meriia fyrir mig.

Gleðilegt nýtt ár

2007-01-13T11:33:00.000+03:00

Jæja, bara 3 vikur síðan ég skrifaði síðast, uþb. Þetta er semsagt met hjá mér miðað við fyrri skrif. Ég vildi skrifa dálítið um jólin.

Ég var að vinna kvöldvakt á aðfangadag. Sú vakt er frá 13.30-21.30. Ef það var ekki nógu slæmt þá var ég að vinna 7-15 á jóladag, semsagt enginn tími til að gera neitt nema að sofa þarna á milli. Jólamaturinn hjá mér var því miður ekki borinn á borð kl 18.00 á aðfangadegi.

Á aðfangadegi vöknuðum við Riku kl 7. Ég skellti mjólk og hrísgrjónum í eldfast mót skv leiðbeiningum á pakkanum og vonaði að úr yrði hrísgrjónagrautur (tilheyrir víst jólunum hérna) á meðan Riku kveikti á saunanu (jólasaunað er fastur liður). Við dúlluðum okkur svo í sauna og fengum okkur svo jólamorgunmat eftir það. Við vorum með hrísgrjónagrautinn, eitthvað brauð, hrísgrjónabökur sem heita Karjalanpirakka (kíkið á google myndir) sem eru alveg namm og svo smákökurnar sem ég bakaði þarna um daginn. Eftir jólamorgunmatinn opnuðum við svo pakka og höfðum það bara kósí þangað til að ég þurfti að fara í vinnuna.

Á jóladag elduðum við svo jólamat með Petri og Hebu. Finnar eru voða fastir á hvað maður á að borða á jólunum. Það er alltaf ofvaxin skinka (svona 10kg hlunkur), kartöflue-ðmauk, gulrótae-ðmauk og rótae-ðmauk. Þar sem hvorugt okkar Riku hefur áhuga á skinkunni vorum við með kjúklingarúllu í staðinn og svo þessi þarna maukin. Upp á íslenskan máta var ég svo með gular og grænar baunir auk rauðkáls. Heba kom svo með ljúffenga ostaköku í eftirrétt.

Ég fékk alveg ágætar gjafir. Skartgripi, bækur, disk með Pálma ofl ofl. Þakka öllum. Ég fékk líka einhvern slatta af jólakortum sem mér þykir alltaf vænt um að fá. Þó að ég sé léleg við að halda sambandi er alltaf gaman að láta svona smá í sér heyrast amk einu sinni á ári. Það er líka voða gaman þegar fólk sendir myndir af börnunum sínum, er svona aðeins hægt að fylgjast með.

Við erum ekki enn komin með snjó en það er undir frostmarki núna og hvítt úti. Hávaðaskrímslið er búið að vera á fullu. Held ég hafi ekki minnst á það áður en við búum rétt hjá skíðastökkbretti. Í hvert skipti sem hefur snjóað, verið fyrir neðan frostmark fer einhver maskína í gang til að setja snjó á brettið. Þetta er í gangi allan sólarhringinn og gefur frá sér leiðindarhljóð. Þetta er ekki hátt hljóð en svona maskínuvæl. Ég sef með höfuð undir kodda þær nætur, hjálpar smá en ekki nóg.

Hmm lítur út fyrir að Fido dverghaninn minn sé vaknaður. Þetta er örsmár fugl (sama tegund og zoth ef einhver man eftir honum) en hann er alveg á því að hann eigi mig. Fido hefur tekið upp á því núna að fljúga í fangið á mér. Hann hefur gert þetta tvisvar. Fido er af hænsnakyni og getur eiginlega ekkert flogið þannig að þetta er þónokkuð afrek af honum.

Það á að taka spítalann sem ég vinn á í gegn núna í vor. Það eru voða miklar vangaveltur um þetta í vinnunni. Þetta er voða lítill spítali, 3 deildir. Húsið var byggt 1936, það hafa verið gerðar einhverjar endurbætur en þetta á víst að vera vegameira. Við þurfum að yfirgefa svæðið á meðan. Spurningin er svo hvert við förum og hvert fara sjúklingarnir (flestir þeirra hafa verið þarna í ár eða meira, þurfa ekki endilega að vera á spítala, hafa bara ekki fengið pláss annarstaðar). Líklegast fara sjúklingarnir á svona legudeild á hjúkrunarheimilinu (spítalinn tilheyrir gríðastóru hjúkrunarheimili, 35 deildir eða það stæðsta á norðurlöndum). Starfsfólkið er svo annað stórt spurningarmerki, förum við hingað og þangað til að leysa af í sumarleyfum eða förum við í afleysingar (það eru nokkrar hjúkur og slatti af sjúkraliðum sem leysa af stutt veikindafrí og fara þá einn dag á eina deild og annan á þá næstu) og einhver hefur sagt að amk hjúkkurnar fari á annan spítala þar sem vantar víst 12 eða 13 hjúkrunarfræðinga.

Ef að það var ekki nóg þá er líka spurning um hvort að við (okkar deild verður tekin í gegn fyrst) förum úr húsi í 3 mánuði eða 9 mánuði. Það síðara myndi koma til ef að næsta deild flytur á okkar deild þegar okkar er tilbúin og svo koll af kolli. Það er þannig lagað praktískt en leiðinlegt fyrir okkur að vera bara einhverstaðar í 9 mánuði. Jæja, það kemur eitthvað út úr þessu, ég fæ amk að vinna. Samningurinn minn verður framlengdur, ég hef vinnu þar til 9 mars 2008.

Flamenco byrjar á morgun og mig hlakkar svo til (með þágufallssýki líka).
Ég dansaði fyrir ömmurnar í vinnuni og svo vinnufélagana um daginn. Það heppnaðist voða vel. Ömmurnar virtust hafa gaman af þessu (fæstar hafa góða athygli/einbeitningu). Þetta var passlega stutt, ekki nema 10 mínútur. Ég lagði voða mikið upp úr þessu, var í öllu svörtu og svo með rauða slæðu á pilsinu auk þess sem ég hafði sett það stæðsta og rauðasta blóm sem ég fann í hárið á mér.

Gleðileg jól

2006-12-21T14:35:00.000+03:00

úfffff, hef ekki uppfært þetta í tvo mánuði núna, ég sem ætlaði að skrifa amk í hverri viku. Jæja það er bara að reyna aftur og reyna betur.

Ég er búin að vera voða dugleg og baka til jólana. Ákvað að koma með jólakökur í vinnuna á afmælinu mínu (á morgun). Ég er reyndar í fríi á morgun (sem betur fer) svo ég kem með góssið á laugardaginn. Ég er búin að baka 4 sortir og ætla að baka amk eina í viðbót. Heba hjálpaði mér líka með þetta :)

Ég verð semsagt þrítug á morgun, loksins. Þýðir það að ég sé ekki lengur krakki? Reyndar eftir að hafa farið í gegn um þvílíkan móral yfir að vera orðin gömul þegar ég var 10-12 ára þá hef ég sagt alveg skilið við allan bömmer yfir aldri. Roll on 40!

Við Heba erum enn að dansa flamenco, alveg voða gaman. Það var sýning hjá okkur í byrjun mánaðarins. Við stóðum okkur alveg frábærlega (þeas enginn sá mistökin okkar ha ha ha). Við dönsuðum tango við lag Estrella Morales ásamt fleiri úr hópnum. Það var voða gaman að geta sýnt heilan dans, sérstaklega þar sem við vorum bara að byrja að læra í haust.

Jólin hjá okkur Riku verða víst með smá óhefðbundnu sniði. Ég er að vinna kvöldvakt (1330-2130) á 24 og morgunvakt á 25 (6.45-14.45). Við ætlum bara að hafa kósí morgun á aðfangadag, borða hrísgrjónagraut ef okkur tekst að búa hann til og svo á 25 ætlum við að hafa jólamat en bjóða Petri og Hebu til okkar.

Það er voða lítill snjór hérna hjá okkur en samt nóg til að jörðin er hvít, sem betur fer. Við fengum hressilega snjó í enda okt/byrjun nóv en það náði allt að bráðna. Ég er að vona að við fáum meiri snjó því að það verður allt svo miklu fallegra þegar er búið að snjóa.

Voðalega er erfitt að skrifa íslensku í dag :-o

Talandi um íslensku þá búa víst núorðið 4 íslendingar í Tampere. Hinir 3 vinna allir í sama fyrirtækinu he he. Það er bara ég sem er að þrjóskast við að vinna ekki hjá Fyrirtækinu heldur að vinna með finnum.

Jæja óska öllum lesendum mínum gleðilegra jóla og farsæls komandi árs. Reyni að vera duglegri að skrifa í framtíðinni.

Þriðjudagsleti

2006-10-17T14:15:00.000+03:00

Hmm gengur ekki alveg nógu vel hjá mér að halda mig við þetta blogg. Ætlaði í upphafi að skrifa ca vikulega en nú eru liðnar 3 vikur frá síðasta bloggi. Ojæja, betra seint en aldrei.

Ég er aftur með frídag í dag. Er bara að dunda mér heima og slaka á. Þetta er bara stakur frídagur, nenni ekki að gera neitt of mikið, á morgun þarf ég að fara aftur í vinnuna. Það er annars ein ástæða fyrir bloggleysi mínu, hef haft voða lélega frídaga (6 frídaga fyrir hvert 3 vikna tímabil) og verið að gera of mikið þegar ég hef þá. Ég er komin með nýjan yfirmann núna og vona að henni takist betur að skipuleggja frídagana svo að þeir komi alltaf tveir og tveir.

Ég þarf senn að fara að vinna í jólakortagerð. Ég vil koma kortunum mínum út helst í enda nóvembers. Það eru mjög fáir sem vita nýja heimilisfangið mitt og ég var að hugsa um að nota kortin til að auglýsa það líka. Annars er allt í lagi að senda á gömlu addressuna, pósturinn á að framsenda það þangað til næsta sumars. Ég keypti svoleiðis þjónustu af þeim.

Ég tók upp á þvi að fara aftur í danstíma. Ég er að læra flamenco aftur. Mér tókst þar að auki að plata Hebu með mér. Við förum alltaf á sunnudagseftirmiðdögum. Mér finnst alveg æðislega gaman að vera komin aftur í dans. Ég reiknaði það út að ég hef ekki verið í neinum danstíma í amk 15 ár. Skelfilegt hvað tíminn líður! Þar sem ég vinn vaktavinnu enda ég oft á því að fara í danstímann eftir að hafa unnið 8 tíma morgunvakt. Fyrstu skiptin þurfti ég þvílíkt að draga mig en núna hlakka ég til frá laugadegi að komast loksins í dansinn sama hversu þreytt ég er.

Jæja, ætti kanski að fara að vaska upp og laga til. Íbúðin er ekki í stór glæsilegu ástandi.

Dugnaðurinn

2006-09-20T17:53:00.000+03:00

Jæja þá er það færsla númer 2. Sjáum hvort ég nái að halda þessu áfram.

Ég er í fríi í dag. Ég er samt ekki búin að liggja í neinni leti (amk ekki mikið lol). Ég tók mig til og:
~ Henti rusli (í Finnlandi þarf maður að labba með ruslið sitt í fötu og henda réttu rusli í rétta fötu).
~ Ryksugaði niðri
~ Skúraði gólfið í herberginu hans Fido** (aka herbergið þar sem ég er með tölvuna mina ofl, er líka hægt að nota sem gestaherbergi *hint hint*)
~ Þvoði upp alla diskana (sumir voru fúllyktandi ooooooojjjj)
~ Gekk frá hinu og þessu drasli

Ég byrjaði annars daginn á verslunarleiðangri. Ég keypti:
~ 3 sokka (smá sokkasýki í gangi, á líkl. um 50 pör)
~ 2 naríur (enn stærri naríusýki í gangi, á yfir 100 pör) úr uppáhaldsbúðinni minni. Ég er sjúk í naríurnar frá þeim af því það eru alltaf fyndar myndir á þeim.
~ 2 svarthvítar peysur fyrir veturinn, eina frá veromoda og hina frá H&M
~ 1 prjónakjól
~ 1 par af vettlingum (í viðbót við þá 2 sem ég keypti í gær....)
~ 2 klúta/slæður
~ fullt af boxum til að geyma mat í, núna á ég loksins frystir og ætla að njóta þess :-D
~ box til að skipuleggja hárspennurnar mínar. Er alltaf í vandræðum með þetta.

Fido var fyndinn, þegar ég var búin að skúra gólfið þá hélt ég honum í búrinu í svolítinn tíma. Hann var ekkert allt of hress með þetta af því hann er vanur að fá að labba um allt herbergið. Svo þegar ég loksins hleypti honum út var hann fljótur að skoða sig um og sjá hvað þetta var sem ég hafði nú gert. Forvitinn gutti.

Ég nenni ekki í vinnuna á morgun :-/ Ég er að vinna í 4 daga áður en ég fæ frí og þá bara einn frídag eins og í dag. Vinna vinna vinna vinna.

Ég fæ nýja "ömmu" á morgun. Í Finnlandi tíðkast það að hafa eigin sjúkling á spítölum/sjúkrastofnunum. Það þýðir að maður á að sjá aðeins meira um mál þessarar manneskju. Sú sem var mín áður komst á elliheimilið á mánudaginn. Það var gott en sárt að sjá á eftir henni, hún hafði verið hjá okkur í allt sumar.

Nýja "amman" mín kemur frá öðrum spítala. Steypa hvernig dæmið gengur fyrir sig. Gamla fólkið þarf að bíða á einum spítala til að komast á annan og ég held jafnvel að við séum þriðji spítalinn í þeirri keðju. Þau fá ekki að komast á biðlista á hjúkrunarheimilið fyrr en þau eru hjá okkur þó að þau hafi lengi verið með það góða heilsu að geta verið á hjúkrunarheimilinu.

O jæja, þetta fyrir komulag er röfl fyrir annan dag :-D

**fyrir þá sem ekki muna er Fido dverghænsnið mitt :-)

Ný byrjun

2006-09-15T14:44:00.000+03:00

Ég var að lesa yfir bloggið hennar Söndru og ákvað að herma og byrja með mitt eigið. Svo er bara að sjá til hvort að mér takist að halda þessu við.

Ég sit heima í dag, frídagur. Var á næturvöktum su-mið. Næturvaktir eru alveg ágætar en mér viriðst ganga afar illa að ná svefninum á rétt strik. Vakti þar til kl 5 í nótt og vaknaði ekki fyrr en 13.30 í dag. Er bara búin að vera að dúlla mér siðan. Reyndi að ná video af Fido (dverghænsninu mínu) í sandbaði en kuði er svo feiminn að um leið og hann sér mig þá felur hann sig.

Það er sól og blíða úti og ég sit inni. Ég er alveg búin að gefa upp á að verða brún, síðast þegar ég virkilega reyndi þá skemmdi ég bara húðina á mér. Þetta lítur alveg nógu fallega út svona í gegn um gluggann.